编曲 : 藏歌行

མཆོད་པ།礼赞之歌

མེ་ཏོག་འདབ་བརྒྱ་གྲོལ་བའི་གདན་སྟེང་ན།

རྟ་ནོར་ལུག་གསུམ་གར་གྱི་རྩེད་འཇོ་ཅན།

ཕ་སྦྲ་སྨུག་པོ་ཕུབ་པའི་ནང་རོལ་ན།

གཤིས་དྲང་འབྲོག་མི་འོ་མའི་དགོད་འཛུམ་ཅན།

ལུས་ཀྱི་སྟངས་སྟབས་བསྒྱུར་བའི་རྡོག་བྲོ་འདི།

འབྲོག་སྡེ་ཕྱུག་མོ་དར་བའི་མཆོད་པ་ཡིན།

རྣང་ཞིང་ཉི་མས་འཚོས་པའི་འོད་ཁྱིམ་ན།

བཅུད་ལྡན་འབྲས་བུ་སྙེ་མའི་རླབས་ཕྲེང་ཅན།

ཕ་མཁར་སྨུག་པོ་བརྩིགས་པའི་ནང་རོལ་ན།

རྒྱུད་བཟང་རོང་མི་དུང་གི་སེམས་གཤིས་ཅན།

ངག་གི་རྒྱུད་སྐུད་དཀྲོལ་བའི་སྙན་གླུ་འདི།

རོང་སྡེ་ཕྱུག་མོ་དར་བའི་མཆོད་པ་ཡིན།

གློག་འོད་ཁྲི་སྟོང་འཚེར་བའི་འཇའ་ཁྱིམ་ན།

ཚན་རྩལ་རིག་པའི་ནོར་བུ་སྒྱུ་འཕྲུལ་ཅན།

ཁང་བརྩེགས་དགུང་དུ་ཟུག་པའི་ནང་རོལ་ན།

ཤེས་བརྩོན་གྲོང་མི་རིག་པའི་བློ་གཤོགས་ཅན།

ཡིད་ཀྱི་དྭངས་མ་བསྲུབས་པའི་སྨོན་ལམ་འདི།

མཁར་གྲོང་ཕྱུག་མོ་དར་བའི་མཆོད་པ་ཡིན།

ཁྲོམ་ཆེན་འདུ་ར་འཚོགས་པའི་གྲལ་དབུས་ན།

རྒན་དར་གཞོན་གསུམ་སྐྱིད་ཀྱི་རྩེད་དགོད་ཅན།

དགའ་སྐྱིད་སྤྲོ་དགས་མྱོས་པའི་བར་གསེང་ན།

གངས་ཅན་བོད་མི་གླུ་གར་གཏམ་གསུམ་ཅན།

ལུས་ངག་ཡིད་གསུམ་བརྒྱུས་པའི་ཤིས་ཚིག་འདི།

གངས་ལྗོངས་ཕྱུག་མོ་དར་བའི་མཆོད་པ་ཡིན།